Connect with us
no

SUSASTRA

Puisi-puisi Alfrits “Ken” Oroh

"Senja Danau Tondano". Foto oleh: Greenhill Weol

KALENDER TONDANO I

 

Wer somu – somu

kong udara dinging

beking tulang maso dinging

sampe badan so manucu

kalu nyanda tahang

gampang dapa saki

 

Panas kadang datang

mar ujang nda pernah alpa

nda kanal bulan

mar dorang tetap batanang padi

deng piara ikang karamba

 

Itu no depe nama Tondano

ada UNIMA tampa bakuliah

Tanah subur nda pernah kring

aer mengalir dari danau Tondano

Ibu kotanya Minahasa

 

Dapainga…

Kalu dulu qta cuma dengar

tu danau Tondano bersih deng lebar

ada hidop burung Manguni

ikang payangka, bomboya, mujair deng nike

 

Kasiang skarang taong so baruba

qta so nda riki lia

tu burung Manguni, ikang payangka, bomboya

deng depe lebarnya danau Tondano

karna jenjer so balingkar kong

pohong so banya orang potong

 

Mar untung jo…

Qta masih rasa om kumis pemasakan

mujair woku deng tu nike goreng tamba tino rangsak

qta makang sampe ta kanyang – kanyang

riki amper pica ta pepuru

 

==============================

 

KALENDER TONDANO II

 

Pasiar ka pasar Tondano

kalu cuma mo bajalang kaki

jang banya balia ka kanan ato ka kiri

Lebe bae jalang turus jo

kong pasang mata di kaki

supaya nda ta injang

tai kuda ato sapi

 

Bagitu lei kalu mo pasiar

ka pinggir danau Tondano

Nae bendi balia pemandangan ka kiri ato ka kanan,

kage-kage so dapa lia wewene

mandi nda sadar diri batalanjang bulat

sampe om Lole so tagantong badiri

 

Itu Lince bataria ta rabe – rabe

cari depe anak bapontar so lupa pulang

Karna tadi sore Lince cuma babauni

deng bakarlota di birmang pe ruma

Hele laki so pulang kobong dia nda tau

kong blum momasa

for mo makang ini malang

 

Ado kasiang depe laste

piring terbang deng tu kobong binatang

kaluar ta bongkar dari depe sarang

 

==============================

 

DAN TENTANG SAMUA

Bajalang bapontar

nda siang nda malam

kong nda dapa rasa lelah

Ba cirita badiskusi

baku bagi ilmu baku bagi motivasi

tentang dunia seni

Itu yang qta cari!

 

Bargaul deng tamang-tamang

beking satu visi satu misi

mobangun eksistensi

for torang pe budaya lokalitas

supaya jang kalah sisi

deng tu kapitalisme global

Itu baru bilang berarti!

 

Batulis babaca

kong pentas cari sensasi

beking lebe berarti daripada

dudu minung aer kata-kata

pake makang tola-tola

depe laste maso panjara

karna cari gara-gara

Itu baru bilang perkara!

 

Banya berkarya, banya berita

Banya bicara, banya orang cirita

Tentang masa, tentang rasa

Tentang cita,tentang cinta

Dan, tentang samuanya!

 

Alfrits H. J. Oroh. Seniman serbabisa yang lahir di desa Wuwuk kecamatan Tareran, Minahasa Selatan, 16 April 1982. Dibesarkan dalam tradisi masyarakat petani penghasil cengkih dan cap tikus Tontemboan. Hari ini dia masih terus menelusuri Jalan Sepi seorang seniman: bersajak-puisi, melatih lakon, melukis, dan berseni-rupa di mana langkah kakinya menyeret tubuhnyanya di seantero Minahasa.


Kurator: Greenhill Weol


 

1090total visits,22visits today

Continue Reading
Click to comment

Leave a Reply

Alamat email Anda tidak akan dipublikasikan. Ruas yang wajib ditandai *