Connect with us
no

SUSASTRA

Puisi-puisi Karya Andre Barahamin

"Mendarat". Foto oleh Greenhill Weol

BREAKFAST

 

Roti satu biji

Tamba

Satu glas kopi

Par deng roko

Bekas da esta tadi malam

 

==============================

 

BU` FENTJE ORANG PONDOL

 

Bu’ Fentje tinggal di pondol

Umur so amper lima pulu

So pengalaman tentang tu hidup

So banya’ makang garam hidup

Mar nda perna kana’ dara tingggi

 

Depe anak nama uben

Skolah SMA 3 mar nda riki klar

Bu’ Fentje bilang

“tu skola pe ongkos rupa mo se kaweng anak”

 

Di muka ruma ada kios kacili

Ja jual aqua glas, deng sagala macam rokok

Ada le rinso deng soklin ta gantong

For tongka hidop di manado

Yang lebe hari lebe mahal

 

Pas kita tanya soal mol di muka rumah lorong bu fentje

Yang so pasti jadi saingan pa bu pe kios

Dia cuma tatawa kacili

Nintau lucu ato karna sedih

 

Itu mol di muka lorong

Da bekeng di atas laut tampa bu fentje dulu mancari

Sampe bu pe pelong musti jual murah meriah mencret

Lantarang so nda ada tampa mo taro akang

Kalo mo taro musti bayar doi retribusi

nintau for apa mar itu wajib orang bilang

Apalagi dulu bu fentje ta makang dorang pe janji

Kalo tu mol mo kase karja for samua orang pondol

Padahal sampe skarang nda perna ada bukti

 

Bu’ Fentje masih sama rupa dulu

Orang pondol sampe skarang

Tinggal di lorong kacili yang sasa’ dada kalo lewat

Padahal kiri kanan pe banya’ mol gaga

 

Mar bu fentje masih sama rupa dulu

Makang bras pra sejahtera tiap hari

Deng sampe skarang masih tetap ba harap

Sebelum mati masih sempat mangael di lao

 

==============================

 

LEBE TAU

 

Tante mintje

Jual ikan di pasar Karom

Pasti bangun pagi

 

Om fritz

Tukang sapu jalang di 17

Pasti bangun pagi

 

Ses neti

Jual nasi kuning di Kleak

Pasti bangun pagi

 

Brur anto

Penjaga SD di Tuminting

pasti bangun pagi

 

Coba tanya

Pa dorang

Bage mana

Matahari muncul

 

Kalo….

 

Rini, sabla rumah

Bodi gaga, hobi TKB

Pasti tidor pagi

 

Utu, sei masjid

Badan tipis, karja ojek

Pasti tidor pagi

 

Nunu, muka jalang

Muka asang, ba jual roko

Pasti tidor pagi

 

Tole, blakang wartel

Fol tato, hobi bagate

Pasti tidor pagi

 

Coba tanya

Pa dorang

Bage mana

Bulan pe muka

 

 

Andre Barahamin, Penyair asal Nanusa, Sulawesi Utara. Penulis di berbagai media Nasional & Internasional.


Kurator: Greenhill Weol


 

212total visits,1visits today