Connect with us
no

SUSASTRA

Puisi-puisi Karya Charlie Samola

Kolase: Indoktrinasi Birahi karya Charlie Samola

SAJAK BURUNG TAONG

 

Burung Taong

Dia pe keak sampe ka gunung-gunung

Tebus dosa muka-muka hari besar

Terbang diatas kacerewetan umat Tuhan

 

Dia paling suka makang Nasi Jaha

Dia suka batera minung Saguer

Burung Bangke kalah cepat

Babi, anjing, deng ayang mati

Burung Taong so jaga lebe dulu

 

Darah Burung Taong

Lebe merah dari tanggal kalender

Tajang dia pe mata

Nyanda pernah lala bajaga

Di tiap-tiap perempatan waktu

 

=====================================

BLUES FARLAMENG

 

Dikamar ini kita bagadang dengan kakosongan

Dirumah ini kita bakurung dengan keterbatasan

Kita kaluar, so batunggu si penyesalan

Kabar orang senang belum jaga brenti

Babalucur gaga diatas meja

Kita jadi langganan situasi pasrah

Itu harapan  memang masih tasimpang disurga

 

 

=====================================

REFLEKSI KAWANUA

 

Mari torang tatawa

For komedi-komedi gelap

Deng cirita-cirita lawak muka asang

Tentang orang laeng deng diri sandiri

Di tanah ilang-ilang slak ini

 

Mari torang manangis

For drama-drama pidis

Sampe torang pe aer mata

Bole kase subur tatanaman  deng padi-padi

Sampe kase kuat arti medis pohong-pohong seho

 

Nyanda ada salah torang samua

Sama-sama pigi baperiksa saraf

Seilang sorodo pake vitamin beras deng ubi

Nda salah torang bole beking Jibril turung kabumi

Gara-gara sotau bagus cinta itu bukang ilah

Kong darah tinggi bukang diri pe boss.

 

 

Charlie Boy Samola, Seniman dan Sastrawan Minahasa, lahir pada tanggal 15 Desember di Manado. Berdomisili di desa Kolongan kecamatan Kalawat, Kabupaten Minahasa Utara.


Kurator: Greenhill Weol


 

124total visits,1visits today

Continue Reading
Click to comment

Leave a Reply

Alamat email Anda tidak akan dipublikasikan. Ruas yang wajib ditandai *