Connect with us
no

SUSASTRA

Puisi-puisi Karya Frisky Tandaju

"Minahasa". Foto oleh: Frisky Tandaju

ORANG KAMPUNG

 

Orang Kampung

Sayor popaya deng dabu dabu

Nasi milu deng ubi kayu

Sayor rubus isi di bulu

Orang kampung nyanda bolotu

Bawa bekal milu songara

Mar nyanda lupa for mo skola

Mama deng papa kurang maraya

Yang penting anak jadi sarjana

 

Orang kampung

Pigi kobong masi glap glap

Pulang kobong hari so glap

Se skola anak deng dada tegap

Asal nyanda hasil suap

Makase banya so dengar akang

Kita ini cuma orang kampung

Yang pastiucumamerenung

Lebe bae bangun tu kampung

 

==============================

 

PINABETENGAN NYANDA MATI

 

Masa so berganti

Pinabetengan nyanda mati

Nyanda cuma ganti kuli

Pinabetengan harga mati

Cuma besar deng nasi milu

Pinabetengan nda pernah malu

Dunia so datang deng era baru

Pinabetengan nda ragu-ragu

Pulang kampung gantong capatu

For mo sambut tu hari baru

Pinabetengan musti maju

Nyanda Cuma baganti baju

Kalo datang bulan desember

Cuma bete dengan saguer

Dari pada Cuma for pamer

Nentau kote orang koruptor

Jangan ragu bangun tu kampung

Masi banya tana di gunung

Biar makang nda nasi gunung

Asal nyanda utang malendong

Pinabetengan tanah lahirku

Nyanda cuma sampe bakuku

Mari samua baku beking maju

Torang samua nda cuma batu

 

==============================

 

TORANG PUNYA

 

Tana’ ini torang punya

Wale ini torang punya

Lalan ini torang punya

Sampe got torang punya

Mar,

Hidop ini cuma nda lama,

Wale cuma sementara,

Lalan so beking ilang jalan,

Sampe got so jadi tampa tinggal

sama sama deng tikus,

Kurang mo bakuku pa Empung

“Temboney se mangale ngale”

I hope some day you will join us

 

Frisky A. S. Tandaju, lahir di Pinabetengan 22 Agustus 1981. Aktifis Adat & Seni Budaya Minahasa. Berkeseharian sebagai Paramedis di Rumah Sakit Umum Daerah DR. Sam Ratulangi Tondano.


Kurator: Greenhill Weol


 

417total visits,1visits today